Libeliñas: 2017

9 dic 2017

Sympetrum sinaiticum (Dumont, 1977)

Dedicamos este post a José Gándara e Luis Canencia.

Grazas a José e Luís puidemos ver e fotografar algúns exemplares de Sympetrum sinaiticum na Comunidade de Madrid. Foi unha viaxe de poucas horas pero resultou un paseo formidable na compañía de Luís, xunto coa observación e audición dos bandos de grúas que voaban cara o sur.

Con esta especie conseguimos completar a lista das libélulas observadas e fotografadas que se reproducen na Península Ibérica.

Unhas poucas características diferencian a esta especie dos demais Sympetrum: S. sinaiticum é de tórax pouco marcado, soe ter a parte inferior dos ollos gris-azulada e unhas liñas negras na parte superior dos laterais do S2-3. Nos machos o apéndice inferior case é tan longo coma os apéndices superiores.

Macho

2 sept 2017

Zygonyx torridus (Kirby, 1889)

Fotografamos esta especie na viaxe ao sur de Andalucía 2017. É unha libélula complicada de ver pousada, e como xa comentei no post da viaxe, moi difícil de fotografar. Atopamos exuvias e vimos moitos exemplares voando a varios metros de altura.

Macho de Zygonyx torridus

Exuvia de Zygonyx torridus

27 ago 2017

Viaxe ao sur de Andalucía agosto 2017

Viaxamos dende Parga a Medina Sidonia, para comezar dende aquí unha visita a diversos puntos do Parque Natural Los Alcornocales e do Parque Natural Sierra de Grazalema no sur de Andalucía.

Coñecemos varios pobos fermosos e acolledores como Jimena de la Frontera, Gaucín, Ronda, Montecorto e Zahara de la Sierra, ao mesmo tempo que percorríamos zonas para fotografar libélulas.

O primeiro día grazas a grata compañía de Jose M. Gaona que nos acompañou e ensinou o Orthetrum nitidinerve, puidemos fotografar un exemplar e tamén observar e fotografar Orthetrum coerulescens, Orthetrum chrysostigma, Orthetrum trinacria, Paragomphus genei, Sympetrum fonscolombii, Crocothemis erythraea, Selysiothemis nigra, Diplacodes lefebvrii, Trithemis annulata e Trithemis kirbyi.

No segundo día na zona do río Guadairo observamos e fotografamos Zygonyx torridus, unha libélula complicada de ver pousada e polo tanto difícil de fotografar. Atopamos exuvias e vimos moitos exemplares sempre voando a varios metros de altura. Tamén observamos Calopteryx haemorrhoidalis de distinta coloración aos exemplares do noroeste ibérico e Onychogomphus forcipatus, Anax imperator, Anax parthenope, Platycnemis latipes, Erythromma lindenii e Erythromma viridulum.

Fotografías dalgunhas das libélulas desta viaxe, agosto 2017.

Unha femia de Orthetrum trinacria comendo un macho de Trithemis annulata

Orthetrum nitidinerve

Zygonyx torridus

Exuvia de Zygonyx torridus

Femia de Paragomphus genei

Sympetrum fonscolombii

Onychogomphus forcipatus

Trithemis kirbyi

Trithemis kirbyi en Montecorto

Montecorto

Río Guadairo

26 ago 2017

Parc Naturel Régional des Pyrénées Catalanes xullo 2017

Nesta viaxe visitamos Plaiaundi e a Cerdaña francesa e catalana, onde subimos aos lagos de Les étangs du Carlit. Nesta zona fixemos diferentes rutas espectaculares para ver varias lagoas de montaña comezando todas elas dende o Lac des Bouillouses. Ao regreso tamén visitamos varios puntos en Aragón.

Dende Mont-Louis subimos ó corazón dos Pireneos cataláns. A 2016 metros de altitude visitamos o lago artificial de Lles Bouillouses, espazo natural protexido dunha gran beleza. Dende este punto realizamos a ruta dos 12 lagos para poder observar este magnífico lugar e tamén fotografar as libélulas de montaña.

No verán, para protexer este espazo natural, a circulación de automóbiles está restrinxida. En xullo e agosto, pódese acceder ao lago no autobús que sae de Pla de Barrès, no telesilla desde Font-Romeu ou camiñando polos carreiros.

Pasamos calor e algún incidente coas tempestades e a sarabia, pero mereceu a pena e en total observamos 34 especies de libélulas: Calopteryx virgo, Calopteryx xanthostoma, Lestes virens, Platycnemis latipes, Pyrrhosoma nymphula, Coenagrion puella, Coenagrion hastulatum, Erythromma lindenii, Erythromma viridulum, Ischnura graellsii, Enallagma cyathigerum, Lestes sponsa, Cordulegaster bidentata, Cordulegaster boltonii, Anax imperator, Anax parthenope, Aeshna grandis, Aeshna juncea, Onychogomphus forcipatus, Somatochlora metallica, Orthetrum cancellatum, Orthetrum coerulescens, Orthetrum brunneum, Libellula depressa, Libellula quadrimaculata, Sympetrum danae, Sympetrum flaveolum, Sympetrum fonscolombii, Sympetrum pedemontanum, Crocothemis erythraea, Selysiothemis nigra, Leucorrhinia dubia, Trithemis annulata e Trithemis kirbyi.

Algunhas das libélulas fotografadas nesta viaxe, xullo 2017.