Da Lagoa de Cospeito a Lagoa de Doniños

Onte, nun día de xuntanza coa familia Ferreiro Pardo, tivemos a sorte de observar varias especies de odonatos. Xunto con Lorena, Ricardo, Antía e Xurxo visitamos primeiro a Lagoa de Cospeito. Nun principio, era o espazo que pensábamos visitar para todo o día, pero dada a case ausencia de observacións de libélulas, decidimos buscar lugares máis cálidos, e despois de comer unhas pizzas chairegas deliciosas da casa Rozas, fomos á procura de Brachytron pratense á Lagoa de Doniños.

Calopteryx inmaduro na Lagoa de Cospeito

Foi unha boa decisión! Xa que ao pouco de chegar xa estábamos observando varias especies e entre elas Brachytron. Foi un día moi entretido e agradable, observamos Calopteryx virgo, Calopteryx xanthostoma, Lestes dryas, Sympecma fusca, Coenagrion puella, Ischnura elegans, Enallagma cyathigerum, Pyrrhosoma nymphula e Brachytron pratense.

Cópula de Brachytron pratense

Cópula de Brachytron pratense

Enallagma cyathigerum comendo

Libélulas en familia

Brachytron pratense (Müller, 1764)

Nunha das primeiras saídas para ver odonatos este ano, Martiño e eu visitamos O Grove.
Neste día, entre outras especies, vimos varios exemplares de Brachytron pratense na canteira da Lanzada, e nas charcas intradunares.

Brachytron pratense é un pequeno Anisóptero que adoita ser confundido con algunhas especies do xénero Aeshna, pero o abdome é moito máis curto.
O macho ten os ollos azuis; ten o tórax verde claro coa parte superior marrón; dúas manchas antehumerais verdes, grandes e estreitas. O abdome é negro brillante con máculas alargadas azul claro, exceptuando no S3, que son verdes. Apéndices anais estreitos, longos, e curvados cara a dentro. Nas imaxes pódemos observar como resalta a presenza de pequenos “pelos” por todo o corpo.
A femia ten os ollos escuros; tórax marrón con ausencia de manchas antehumerais ou residuais de cor amarela. Abdome negro grisáceo con máculas dobres reducidas amarelas.
Apéndices anais moi longos, rectos e estreitos.
Distribúese pola costa galega, onde voa a principios da primavera nos principais humidais costeiros.


Fotos na Lanzada, 29 de marzo 2012

Cópula



Téneral